برامج مفيدة - ✨مدونة فتّو

بسم الله الرحمن الرحيم،

و من باب نشر العلم ومشاركة التجارب النافعة
حبيت أشارككم البرامج اللي فادتني ببداية مشواري مع الأمومة

وساعدتني شوي أفهم حمودي و متطلباته
* كل البرامج باللغة الانجليزية للأسف،
ما لقيت شي عربي ومفيد

للمعلوميه !
البرامج من البلاي ستور .. نظام جوالي اندرويد، فما عندي خلفية لو موجودة بالايفون ولا لا

+ بس اضغطوا ع اسم البرنامج و يجيكم رابط التحميل

١- اول برنامج من اليسار،
My baby today
هذا برنامج من موقع بيبي سنتر – وبالمناسبة هالموقع مفييد مفييد جدا للحامل و للأمهات والاباء، والجميل بالموضوع ان الموقع فيه نسخة عربية لكن البرنامج لأ مع الأسف 🙁 –

أسجل فيه عمر حمودي
وكل يوم يعطيني مقالة او معلومة اقرأها عنه حسب عمره، و يجيب بعض من تساؤلاتي حول أمور معينة

تقييمي له ١٠/٧ ،
حلو ومفيد لكن بالنسبة لي
حبيت نسخة البرنامج للحامل اكثر ، واللي اسمه :
my pregnancy today
نسخة الحامل من بيبي سنتر كان مغنيني عن كثير برامج الحمل ، لأنه متكامل ويعطي معلومات حلوة ومشوقة

+ ايضا فيه برنامج ثاني للحمل كان يعطيني حجم الجنين ع اشكال فواكة وخضار وكان جدا لطيف ويعطي معلومات حلوة اسمه :

I’m expecting

المهم، يبدو اني شطحت لموضوع الحمل مع الحماس

نرجع لموضوعنا..

٢-

Baby sleep
هذا عبارة عن برنامج فيه عدة مقاطع صوتيه اسمها “الضجيج الأبيض“
مثلا صوت مروحة ، ضربات قلب، او سيارة تمشي، او دش
طبعا بعضكم بينهبل ويقول كيف ازعاج مثل كذا بينوم الطفل؟

قرأت ان هالاصوات اللي على نمط واحد تساعد البيبي انه ينام ،

لاا ! و أزيد من الشعر بيت طلعت أجهزة تنباع بالسوق وظيفتها بس انها تشغل هالاصوات لساعات ، عشان ينام الطفل
الزبدة اني قلت بحمل برنامج يؤدي نفس الغرض وببلاش
ونشوف شيصير ؟
وانا داخليا مب مره مقتنعه بالموضوع،

مثلاً، اقتنع ان الطفل ينام بالسيارة او العربيه رغم الازعاج اللي حوله

لكن ما اقتنعت انه ممكن ينام على اصوات “كذبيه” مسجله!

لكن لا مانع من التجربة

المهم مره كان يصيح وشغلتها له وزاد صياحه
و مرة ثانيه على العكس.. سكت يوم سمعها!
لكني ماجربتها ثالثه
ولذلك ما اقدر أقيم البرنامج $=

٣-

WebMD baby
برنامج جميل .. و هو اساسا موقع طبي، وسووا منه برنامج لكن للطفل فقط،
يحسب لك عمر الطفل + فيه قسم مخصص للاباء بلحالهم وقسم للامهات وقسم لهم كلهم،.
كله مقالات ومقاطع فيديو ، المقالات حجمها معقول مب طويله مره بالتالي ماتمللك و تفيدك ،
و كل يوم يعطيك معلومة أو tip صغيرة ، ويجيب كثير من تساؤلات الأمهات حول اطفالهم..
كذلك يعطيك مساحه تكتبين فيها لنفسك عن الطفل و اوقات رضاعته و التغيير له و و.. الخ

تقييمي له ١٠/١٠

٤-
The wonder weeks
البرنامج اللي أتعب وانا اقوول جميييل جميييل جميل ومفيييد

فاز بعدّة جوائز.. وهو بالأصل كتاب و بحث اكثر من ٣٥ سنة، وفايز بالكتب الأفضل مبيعاً بالعالم
و سووا منه نسخة كبرنامج .. لكنها بفلوس،
للأمانة واجهة البرنامج تفتقر لكثير من الشكليات الجمالية
لكن الزبدة والفائدة كلها بالمحتوى
وظيفته يتابع عمر حمودي و على هالأساس يعلمني وش التطورات اللي قاعده تحصل له والتطورات القادمة ..
و أكثر من مره كنت اقول ليه هالاسبوع يصيح كثير وليه هالاسبوع قل صياحه، و و ..
و ألقى البرنامج كاتب هالشي ضمن التغييرات اللي ممكن تحصل له بهالفتره
الشي اللي للحين ماقدرت أصدقه بالبرنامج اللي هو:
انه معطيني جدول ومرقمها حسب عمره بالأسابيع، و يحط لي تغيراته المزاجية حسب الأسابيع !!
و مرتين لاحظت انه كلامه صحيح!
لكن لازلت مب مقتنعه.. احس كل طفل له شخصيته و يمكنها صدفه صار صح :/

تقييمي له ١١/١٠

أعتبره برنامج مختلف جداً عن اللي قبله بمعلوماته
و دقّتها
بالمقابل مايحل لك مشكله،
وانما مجرد يطمنّي ان الوضع طبيعي إن شا الله لما ألاحظ شي تغير بحمودي ،

٥-
Baby daybook
و آخر شي،
هالبرنامج الجميل.. ساعدني جددددا جددا بأول شهر من ولادتي،
طبعا بما أن التجربة جديدة،
و كوني شخص احب النوم .. ثم فجأة بيوم وليلة يبدا مشوار السهر
عانيت من ضعف بذاكرتي وقلّ تركيز هذيك الفتره

فعلا فعلا كنت انقد على روحي.. يعني عادي جدا اني ألفّز وانسى وين لفزت اغراضي
الزبدة اني كنت ايضا انسى متى اخر مره رضعت حمودي ومتى غيرت له.. وكانوا يطلبون مني احسب وقت رضعاته
وكنت اذا رضعته شفت الساعه واذا خلصت شفتها،
ثم اذا جيت أحسب كم دقيقه رضع، أصير ناسيه متى بدى يرضع !!
اي نعم وصلت لهالدرجة
فحسيت اني بحاجة عدّاد يعد لي، وفعلا لقيت هالبرنامج
سهل وبسيط ويخيرك بين الرضاعه الطبيعيه او الصناعية، و كم ملي رضع ، ويحسب لك الوقت
بالتالي تعرفين كم مدة الرضاعه ومتى اخر مره رضع

ايضا يحسب لك مثلا متى اخر مره غيرتي له، روشتيه، أو طلّعتيه، أو أكلتيه
و قوائم كثيرة.. المهم انه أفادني بموضوع الترضيع والتغيير.. حتى بديت استرجع شوي من ذاكرتي
و صرت الان استخدمه لرضعات الليل بس
تقييمي ١٠/١٠